[align=center:81a8ac9e41]

بـداية وجع الراس

في الشقة رقم ( 30 ) ولمبة الباب محروقة جلست ( هاله ) تدور في الشقة كنها ثعبان يدور جرذي مضيع طريقه .. وهي تصفق بيدها الثنتين وتقول .. وينك ( يا أبو هديب ) .. حسبي الله عليك مت من الجوع كل هذا عمل والله لو أنك رايح تحرر فلسطين قد خلصت من زمان . وهي تدور ، رن التلفون .. ما امداه يكمل الرنه إلا هي طامره وخانقه السماعة بيدها وتقول ألو .. الو ... قلت أنا الو .. قالت بلهفة ( ابو هديب ) وينك يا حبيبي تأخرت .. سكت شوي وقلت لها أقول لا يكثر حبك برص . ما قد جربتي صوت الخط وهو يقول طووط ، طووط ، طووط .. قالت بكل برود لا .. واصك السماعة في وجها ، شوي اتصلت ثاني مرة وقلت هاه وش رايك بصوته .. قالت تستخف دمك يا ( ابو هديب ) وش هالحركات الصبيانية .

أقول يا ( هاله ) ترى مالي خلق نفسي .. لا تخليني اخذ تكسي واجي في البيت أتوطى في بطنك وأرجع مع نفس راعي التكسي ، يكفي أن الكفر مبنشر علي ولي ساعة أاشر محد راضي يوقف لي ، لدرجة أني طلعت ساقي لهم عشان يوقفون محد عطاني وجه .. قالت ( هاله ) يمكن عشانك ما شلت شعر ساقك بحلاوة .. قلت يا جعل الحلاوة تشيل وجهك هاللي كله حب شباب كنه بيتزا سبريم .. أقول يا حلالات من ياخذ راسك ستبنه ، جعله في عيونك هالحولا، بس فيه مشكلة شعرك هالخشن بيخرب الشارع ومنب فاضين يا خذون علينا البلدية ضرايب... ونتوقف في مرور الناصرية عشان تخريب الزفلت .. قالت ( هاله ) بالله ( ابو هديب ) ودي تشوف شعرك هاللي كنه كرتون مسامير صلب .. مدري من اللي لاعب عليك وقايل انك راغب علامة .

قلت لها منتب عاقلة يا فوزية أحمد .. سكتت شوي وقالت وهي مستغربة من فوزية أحمد .. قلت مدري أسم جا على بالي وقلته ..قالت ( أبو هديب ) ساعات أحس انك سبهه ..قلت المهم أنا نصف ساعة وجاي .. ان بغيتي تتغدين تغدي ... ويستحسن تتغدين مع كلب الجيران لأنكم في الأكل لكم نفس الطبايع كلكم تحبون تحطون وجيهكم في الصحن .. قالت لا أنا ابنتظر حبيبي .. قلت أنا . الله تعرفين ناس من وراي منهو حبيبك ؟ .. قالت بدلع انت حبيبي .. جلست اضحك وأنا أقول الله يحوم كبدك حسيت أنك صافقتني بطين في وجهي يوم قلتيها .. وبعدين مصدقه أن فيه أحد يعرفك غيري ... حتى اهلك كل ما وديتك عندهم قال أبوك من هاللي جايتنا .

قالت ما اسمح لك تتكلم على أهلي .. قلت إذا جيت البيت نتفاهم يا عائلة (( روبن ويل )) يا الله مع السلامة .. قالت بدلع ( أبو هديب ) بتسكر كذا بدون ما تعطيني بوسه .. قلت لا ما يهون علي أسكر كذا .. قالت يا الله عطني .. قلت أنا ابعطيك بس مهوب بوسه .. أبعطيك بصدام الجمس في وجهك قلت كلامي هذا ثمن صكيت التلفون في وجها ، ناظرت السماعة شوي ثمن جلست على الكنب كنها سرلنكية مضيعة الإقامة .. وشغلت التلفزيون على قناة الجزيرة .. وهي تتفرج رن التلفون مرة ثانية ، رفعت السماعة وهي تقول ( أبو هد .. ) شوي قالت هلا والله .. هلا وغلا هلا بصديقة عمري هلا بخويتي ( سفنجة ) كيف حالك ، وش مسوية .. قالت (سنفجة ) بخير الله يسلمك يا هلولتي .. كيف المدرسة اليوم عسى ما غثوك الطالبات .. قالت والله مهوب هم اللي غاثيني اللي غاثني واحد ثور عجزت ارضية .. قالت ( سفنجة ) منهو ( أبو هديب ) قالت ( هاله ) وهي تتنهد إيه فيه غيرة اللي سارق قلبي .

قالت ( سفنجة ) شكلك متأثرة بالفنان بديع مسعود في إغنية يا سارق قلبي جبه يا الحرامي .. شوفي يا ( هاله ) عندي لك حل يخليه يحبك ويطيح في دباديبك وينسى عاهاتك.. قالت ( هاله ) عطيني الحل تكفين يا أم الحلول أنا من غيرك ما اقدر أتحرك .. قالت شوفي هو موجود هالحين قالت ( هاله ) لا .. بيجي بعد شوي قالت ( سفنجه ) حلو .. روحي هالحين البسي احسن شي عندك ويستحسن يكون شي مفتوح من الظهر عشان الإغراء ويا حبذا لو فيه فتحه في الساق .. ولطخي وجهك بالمكياج قد ما تقدرين ترى الرجال يحبون المكياج الجامد .. وأول ما يدخل عطيه ظهرك عشان يشوف الثوب من ورى ..قاطعتها ( هاله ) وهي تقول بس أخاف يقول وش هاللبس الماجن ..وش هالفسق ، وهو أنسان غيور ، وما يحب اني اسوي كذا .. قالت ( سفنجة ) وأنت بتسوين لحد غريب .. زوجك ، قالت ( هاله ) طيب سكري هالحين أنت عشان يمديني أسوي شي .. قالت ( سفنجة ) شوفي ابتصل عليك عشان اعرف وش آخر التطورات واوقف معك .

صكت التلفون وقامت ( هاله ) لغرفة النوم ووقفت قدام المراية تزين نفسها وتلطخ وجها ... مع العلم لو أن المراية تتكلم كان تفلت في وجها .. شوي سمعت صوت سيارتي وأنا اوقف عند الشقه .. على طول جت عند الباب كنها حصان مفككين حوافرة .. وعطت باب الشقه ظهرها

دخلت الشقة وأنا منهد كأني شايل ثلاث اسطوانات غاز وراقيبها آخر دور في الفيصلية .. أول ما دخلت شفت هالقماش اللي يلمع على طول مسكت طرفه و ( هاله ) تقول في نفسها شكل خطتك أثمرت يا ( سفنجة ) بديت أحس بيده وهو يمسك ثوبي التفتت علي وهي تقول ( ابوهديب ) مهوب على البابـ ... قطعت كلامها وهي تشوف وجهي يوم طلع أحمر ، وأخضر وعيوني طايرة .. وأنا أقول بروعه وخوف ( هاله ) وش موقفك هنا .. جت عندي ومسكت يدي وهي ماسكه بيدي حست بشي غريب ناظرت لقت يدي سوود ثمن ناظرت في فستانها من ورى لقته كله أسود قالت وهي تبكي وش هذا .. قلت هذي الله يسلمك زيوت السيارة ووصخ الكفر .. رفعت راسها لي وقالت ليش تمسح في ثوبي الجديد .. ناظرت فيها وقلت ما دريت احسبه فوطه

ناظرت فيني وهي بتنفجر وقالت طيب وش رايك بتسريحة شعري .. جلست ربع ساعة أناظر في التسريحه أناظر يمين ويسار وفوق وتحت ... وهي تقول وش فيك كنك ادور أبرة في قومة قش .. قلت لا والله اللي انا أفكر فيه اكبر من كذا .. قالت وش تفكر فيه يا انشتاين .. قلت أفكر كيف العصفور يسكن في العش اللي فوق راسك ... وثاني شي هل العصفور اللي ساكن في شعرك يلبس نعال وإلا لا ، قالت بقهر وغيض وش تشوف انت .. قلت والله اتوقع انه ما يفصخها ابد .. لأنه لو فصخها بتتشقق رجلية من شعرك .

ناظرت فيني وحسيت من نظراتها انها تناظر حيوان برمائي واقف على رجلية .. ناظرتني وهي تقول امش الغدا جاهز .. قلت لحظة اغسل يدي .. قالت توك ممسح يدك في ثوبي .. ناظرت فيها وقلت ببرود عشان كذا أبي أغسل يدي ... لو لامس ظهر كلب كان اكلت على طول . بس ثوبك ما أضمنه

غسلت يدي وجيت على السفرة وجلست آكل بالملعقة ، وأنا آكل سمعت صوت رشفه قوية رفعت راسي لقيت ( هاله ) جالسه تشرب مرق من الصحن وبأصوات مزعجه قلت هاه انت .. طلعت راسها من الصحن وناظرت فيني ووجهها كله مليان مرق .. قلت عسى ماشر سلمات جالس مع وايت شفط وش هالاصوات من اللي مشغل الدينموا في حلقك .

قالت لي وفمها مليان أكل ( أبو هديب ) لا تدقق وبعدين مقيولة البس ما يعجب الناس وكل ما يعجبك .. قلت لها هذا مثل للناس اللي تعرف تطبقه مهوب للناس اللي جايه من جمب المثل شطف مثلك .. شوفي وجهك طلع كنه مزرعة خضار معد أفرقه بين قطع البطاطس والكوسه ، وكله كوم وحبة الفلفل الأسود اللي على اليمين تحت خدك .. طالعه كنك نوال الزغبي قبل عملية التجميل .


ناظرت فيني ولا كأني موجود وجلست تكمل أكل وتقطع الدجاج بشراهه .. من قوة تقطيعها .. انا خفت ان الدور يجي علي وتقطعني .. قلت حشى جالس مع أسد مهوب آدمية .. قالت ( أبو هديب ) أنا اتعب في المدرسة .. عندي سبع حصص وبعض الأحيان المديرة تعطيني ثمان حصص ..قلت أنا ليش .. تدرسين عيال الحارس بعدما يطلعون الطالبات .. أنا اخبر التعليم عندنا أقصى شي سبع حصص في اليوم ... وأنا أتكلم اسمع صوت أنفاس تتردد في الشقة .. وأناظر لقيت وجه ( هاله ) طلع ازرق وهي تحاول تاخذ نفسها .. شوي جيت عندها .. وهي تأشر لي وتقول اضرب ظهري غصيت .. جلست اضرب في ظهرها بيدي ثمن مع الوقت بديت اشوت برجلي .. ماش وجهها كل ماله ويطلع أزرق .. قمت اتلفت في الشقة يمين ويسار .. رحت للتلفون .. وفصلت السلك حقه وشلت الجهاز .. وجيت ركض ورى ( هاله ) ومن بعيد رجمت الجهاز بكل قوتي في نصف ظهرها .. أول ما ضربها التلفون زحفت بوجهها على السفرة وطلع من حلقها عظم الفخذ حق الدجاجه ... وتبعثرت السفرة و ( هالة ) في نصف السماط .. جت بتقوم قلت لها .. خلك مكانك لا تتحركين .. ابتصل على المرور .. قالت ليش .. قلت عشان يجي يباشر الحادث ويعطينا ورقة إصلاح لوجهك .. وأنا أتكلم جا في وجهي صحن ستيل رجعني ثلاث خطوات ورى .. وهي تقول بغيت أموت وأنت جالس تشوت في جمبي .. قلت لها وأنا وش عرفني وين ظهرك فيه .. شكلك دائري اللي يشوفك ما يعرف أن كانك رايحه والا جاية ، وبعدين قبل ما تطلبين مني أي شي عطيني المخطط حق جسمك عشان اعرف تفاصيله ... وإلا ابروح للبلدية وأطلبه من قسم مخططات الأراضي .

شوي سبلت بعيونها .. وهي تقول .. توني ادري انك تخاف علي .. حسيت بحبك يوم فزيت على طول وجيتني .. قلت إذا على الفزة .. كنت رايح اغسل ما دريت عنك بس يوم شفتك تأشرين قلت لازم أوقف لأني ذايق مر أن الواحد يأشر ولا يوقف له أحد .. ناظرت فيني وهي تقول .. ( أبو هديب ) احس انك تتعامل مع رجل كرسي .. مهوب إنسانه لها مشاعر وأحاسيس .. قلت ليكون مفكرة نفسك أنسانه على جسمك هذا .. قالت أجل وش انا . قلت أنت ناقصك لمبتين حمر ورى ظهرك ونكتب في طرف ظهرك على اليمين ( ممنوع الاقتراب لأكثر من خمسين متر ، بين قوسين ( سريع الاشتعال ) )

قالت لي ( أبو هديب ) تطنز علي عشاني سمينة .. على فكرة أنا السمنه هذي راح تنتهي وإلى الأبد .. قلت انا كيف قالت شريت جهاز حق الركض .. قلت أنا اسمه سير جري .. وش حق الركض حتى كلام ما تعرفين تتكلمين.. ودي اعرف بس وشلون باعوك وانتي ما تعرفين اسمه .

قمت وجلست في الصالة وشبكت التلفون .. وشغلت الديجتل وكان محطوط على قناة الجزيرة .. شوي جت ( هاله ) وجلست جمبي ومعها الشاهي ، أخذت الريموت وجلست اقلب .. في القنوات ووقفت على قناة ( LBC ) ... و ( هاله ) تصب الشاهي وتسولف علي وتقول ما ودك تشوف السير حق الركض .. ابي تشوفني وأنا أتمرن عليه .. ناظرت فيها وقلت منتب عاقله يا العداء المغربي عويطه .. شوي فهيت وهي تتكلم وجلست أناظر البنات اللبنانيات .. وانا أقول في نفسي هذولي اللي نطلق عليهم حريم .. مهوب مثل هالخرابة اللي جمبي.. كنها علبة قوطي نيدو .. ناظرت ( هاله ) عيوني طايره .. التفتت على التلفزيون شافت البنات اللبنانيات الحلوات .. قامت تصارخ وطمرت على الشاشه وحضنتها وسدت كل شي بجسمها .. وهي تقول غير ، غير القناة .. انا من الروعه والخوف غيرت حطيت على قناة النيل التعليمية ثمن فكرت وقلت أكثر قناة بترجع لها عقلها القناة السعودية .. على طول حطيت عليها .. ثمن قلت لها وشوله نغير القناة نطفي التلفزيون كله .. التفتت علي وعيونها حمر وأنا ملخم قلت لها ( هاله ) ان بغيتي من بكره ابيع التلفزيون أبيعة ، ثمن قلت وشوله من بكرة ، ان بغيتي انزل بسروال وفنيلة هالحين وأبيعه نزلت... بس اهدي .

شوي هدت وجت عندي وقالت لا يمكن اسمح لأي بنت تهد البيت اللي انا بنيته معك .. ناظرت فيها وقلت هو عندنا بيت اصلا عشان تهده ، ترى على فكرة العلاقه اللي بيني وبينك علاقة صداقه أكثر من زوج وزوجته ... يعني إذا تبين تشيشين وإلا تدخنين عادي لا تستحين .

قالت فكني من مزحك البايخ وعطني رايك في الخاتم .. ناظرت فيها وقلت هذا اللي عليك خاتم .. قالت إيه .. قلت والله على بالي جنط تريلا ...قالت وهي تضحك ما تبطل مزح أبد ، ( أبو هديب ) حطيت الرموت على جمب وانا اقول نعم .. قالت بدلع ومياعة ابيك تعرف شي واحد بس أبيك تعرف اني احبك .. واموت فيك .. قلت ( هاله ) .. قالت نعم يا قلبي .. قلت انطمي وكلي تبن وروحي تدربي على السير اللي انت شاريته .. قالت اروح واخليك تلعب بذيلك هنا .. قلت هاه وش ذيلي .. والله لو انك جالسه مع ذيب والا ثعلب وبعدين من سمعك قال البنات طالعين من التلفزيون وجالسين معي .. توني أبكمل كلامي رن التلفون .. على طول طمرت ( هاله )و شالت السماعة .. وهي تقول هلا .. ردت عليها ( سفنجة ) هلا والله بقلبي ... التفتت علي ( هاله ) وهي تشوفني وتقول لحظة حبيبي .. شالت التلفون وجلست تتمشى في الصالة وتقول أقول حياتي .. وينك ما اسمع صوتك .. و( سفنجة ) تقول لها وش فيك يا ( هاله ) بسم الله عليك ترى انا خويتك انا بنت مثلي مثلك .. و ( هاله ) تقول والله اني عارفه بس مشتاقه لك .

ناظرت فيها وهي تمشي قدامي وفي يدها التلفون ... وتروح يمين ويسار .. وتدلع وطلع لسانها .. وانا اقول الحمد الله رب العالمين .. حطت السماعة تحت اباطها عشان ما يطلع صوتنا وهي تقول .. أقول ما تبي تعرف من أكلم .. قلت وأنا اقرى الجريدة عادي كلمي اللي تبين ... لو تكلمين البواب حق العمارة .. قالت ما تغار علي .. قلت أنا بكل برود واثق من شبابنا ، وثاني شي ما اتوقع أن مستوى ذوقهم راح ينحدر للدرجة هذي ويكلمونك .. وبعدين امسكي السماعة زي الناس ووخريها عن أباطك اللي يكلمك مات من الريحه والله أن يكتبون بكرة على قبرة شهيد ريحة أباط (هالة ).. قالت وهي منقهرة .. انا اكلم خويتي ( سفنجه ) قلت عارف ما فيه إلا هي خرابة البيوت .. هي اللي تعطيك نصايح .. قالت خويتي ويهمها مصلحتي قلت لها أي خوية اللي تقولك اسألي عن زوجك في كل مكان ، ووين يروح ، وحاسبيه ، ونكدي عليه حياته .. شوفي ابعطيك قاعدة اذا تبين تعرفين الشخص تعرفينه من اسمه هي وش اسمها ... قالت ( سفنجه ) قلت يعني حدها تسكن في طشت على كم عصرة من كلوركس وعلبتين فيري اتوقع هذي اسامي جماعتهم مشتق من ادوات التنظيف .

قلت قولي لها مع السلامه .. وتعالي ورينا الجهاز .. انا الإنسانه هذي ما اهضمها .. لو اشرب وراها تنر وقاز ما انهضمت وبعدين هي ما عندها بيت وعيال فاضية للنصايح وأنا أتكلم فصلت الخط .. قالت ( هاله ) ليش فصلته .. قلت أنت مدرسه وفاهمه وواعية .. تسمعين كلامها .. الناس اجناس ولا هوب كل رجال ينطبق عليه نفس الكلام .. ونفس التجربه .. اللي جالسه تقوله لك كلام فاضي وخرافات ... كبري عقلك هاللي كنه غضارة مليانه عرق سوس


قالت عارفه حبيبي .. قلت لها ( هاله ) اذا ما تبينا نخسر بعض لا تقولين حبيبي .. احس بحكه لما تقولينها لأنها ما ركبت عليك .. قالت طيب وش اقولك .. قلت ان قدرتي لا تتكلمين ابد يكون أحسن .. وثاني شي ابسألك وش صار على موعد دكتور العيون حقك . لأني بصراحه تعبت من الحول اللي انت عايشته ومعيشتني فيه يكفي أني أنا اول شخص ذاق صابون التايد يوم حطيتيه في الاكل تحسبينه الملح ، قالت الحمد الله السالفه هذي قديمه .. قلت وش اللي قديمه .. إلى هالحين يطلع من فمي فقاقيع إذا نمت ... وبعدين إذا هذي قديمة فيه سالفه جديدة ... قبل كم يوم المديرة حقت مدرستكم متصلة علي تقول ترى زوجتك مسوية مشكلة .. ناظرتني ( هاله ) وقالت وشي .

قلت لها يا ( هاله ) اجل فيه احد يقوله المدير رح لفصل أولى ألف يدخل دورة المياة ويعطي الحصة فيها .. قالت ( هاله ) والله الغلطه غلطتهم من اللي قالهم يحطون الفصل جمب دورة المياة .. قلت أنا بلاش هذي .. فيه احد يدخل الفصل ويمسك الطباشير ويشرح وبعد ما يخلص شرح تجي المدرسة اللي بعدك وتمسح الشرح اللي كتبتيه على الباب بدال السبورة .. يعني سبورة خضراء كبر بليس تاركتها ورايحه تكتبين على الباب ... تذكرين يوم جيتي بتنحاشين من المدرسة طلعتي من الفصل ودخلتي غرف المديرة على بالك باب الشارع .. يا ( هاله ) خليني ساكت . تنحنحت وقالت اجل تعال اوريك السير وفكنا من هالموضوع .

رحت انا وياها للغرفة الثانية وشغلت السير وجلست تمشي عليه بهداوة .. وأنا اسولف معها قالت اقول ( ابوهديب ) انت ليش ما تحب خويتي ( سفنجة ) قلت انا ما احب النوعية من الناس هذي اللي تترك مشاكل بيتها وتتفرغ لمشاكل الناس .. يعني انت مهوب ادرى من الناس بمشاكلهم وحلولها .. وأنا اتكلم تركيت بكوعي على السير عشان اخذ راحتي .. وانا متركي قمت اضغط على زيادة السرعه وانا ما ادري و اسمع دبك رجلين ( هاله ) عليه وهي تقول( ابو هديب ) ساعدني السير مسرع وقفه معد أقدر اركض ، وقفه والسير تزيد سرعته شوي خبطت ( هاله ) على السير وسحبها على ورى وصفقت في الجدار ... من قوة الصفقة حسيت انها دخلت على الشقة اللي جمبنا .. طفيت الجهاز وجيت عندها .

لقيت عيونها تعدلت وبدون شعور مني قلت الحمد الله علاج مشكلة سبع سنوات انحلت في ضربة وحده لو أني داري كان شاري السير من زمان .. قامت ( هاله ) وشعرها مطشم كنه علبة ببس مصفوقه في جدار مدرسة .

قالت لي ( ابو هديب ) احس اني اشوفك زين .. قلت مبروك راح الحول اللي في عيونك .. قالت يعني ما بقى إلا اني انحف عشان اعجبك .. قلت لا عادي .. اهم شي الاخلاق .

قالت وهي مستحية .. ( ابو هديب ) أنا ابخضع نفسي لرجيم قاسي .. معدنيب ماكله ابد .. ابحاول اني آكل حق اللي يخليني عايشة بس .. قلت هذا الغلط .. يا ( هاله ) هذا اللي انت بتسوينه مهوب رجيم .. هذا انتحار .. اول شي الجسم يحتاج لتغذية طول الوقت من سوائل ، وبروتينات ، وفيتامينات ، لأننا حنا نستهلكها في مشقات الحياة .. ومع الاسف فيه كثير من الحريم عندنا يفكرون ان الرجيم هو الأمتناع عن الأكل مع العلم ان الرجيم هو انك تاكل كل شي بس بقدر .. عشان ما تسمن .. وهذا الشي اللي ابغاك تطبقينه .. في حياتك .. ابيك تفهمين حاجة وحده بس ان الجسم محتاج للغذاء والبروتينات ، والفيتامينات .. وفكرة انك تحرمين نفسك هذا اكبر غلط لأنه راح يكون فيه ضرر على صحتك .. كلي والعبي رياضة

ناظرت فيني وهي تقول .. سم انشاء الله راح اسمع كلامك .. وأطبقة بالحرف الواحد .. وهلحين حاول بس انك تساعدني .. قلت وانا كاتم نفسي .. انشاء الله بس اهم شي انك تعرفين وش معنا الرجيم الصحيح ..

مسكتها ورحت أنا وياها نصلح لها جدول غذائي تمشي عليه ... جدول ما يكون مضر .. جدول يزيد من صحة الشخص بدون ما يزيد من وزنه .

وإلى اللقاء مع حلقة أخرى

تحياتي

[/align:81a8ac9e41]