بسم الله الرحمن الرحيم

اما بعد

حبيت اني اسولف عليكم من سواليفي اللي ماينمل منها << هذا الي ماخذ مقلب بعمره
المهم ذلك اليوم رحت لمشيوير جنمب بيتنا وجيت ،، يوم جيت ولا هاك الجمس اللي موقفن جمب بيت جيراننا وانا اخبر ان جيراننا ماعندهم جمس ماغير سيارات صغيرة << والله من القز عندك ولا دربيل ليلي
المهم وانا كالعادة لابد اني اغض البصر عنهم لانهم جيراننا >>> ايه هين
بس الشيطان حسبي الله عليه خزني وقال ياولد هي تحصل دايم ؟؟ عطها قزة وحدة كذا على جنب
وانا اللي اقز وليتني ماقزيت !!! كانت بنت في ابهى حلة وارق شكل رأيته في حياتي >>>اها بس بلا نصب والله ياكثر اللي تخق معهم اللي بالفضائيات
بس هذي غير شكل لامن طريقة مشيتها ولا من طريقة نزلتها من الباب >>>تقرير مفصل

المهم اني خقيت معها وكل حالتي بس تفكير في هالنوعية اللي سبهت عقلي ...!! سبحان من اوقعها امامي !!
اجتمع شدة بياض البشرة مع شدة سواد العبائة فاجتمع زين في حشمه >>> ترا الولد بدا يسعبل !!
سبحان من خلقها وسبحان من جملها على احسن تدبيره !!
المهم انا عقب هالشوفه ماعد صرت على طبيعتي كل وقتي في هالملحق لاهم لي إلا التفكير بذيك النوعية اللي شفتها وحالتي حاله ماغير تقليب هالجرايد وكتابة ابيات شعر اللي فيها غزل وربي اني ماصرت اتطعم بالغزل إلا عقب ذيك الحالة

عقب هالشوفة الله العالم ان وزني نزل حول 5 كيلوا من الهيام >>> راح وطي من جد !!
المهم اني قلت ياولد انت على هالحالة مايصير تبتل كذا اما انك تخطبها ولا انساها >>>قلب اكشن الاخ
عاد يوم قمت من النوم يوم الخميس الساعة 9،30 على غير العادة >>>> الاخ مايقوم إلا اخر العصر ياربي لاتبلانا
المهم اني يوم قمت ولا هالعجيز والشويب يتقهوون مع بعض في احد احواض النخل >>>> العن ام الرومانسية اللي كذا ياشيخ ... لاوبعد ذبان كملت !!
المهم اني جيت وامسك الدلة واتقهوة والزم على ابوي .. ويحيد يبيي والزم على اميمتي واقدع من هالتمر ... وابوي طاااايرة عيونه فيني وامي نفس الحالة .... >>>> ايه بعذرهم بلاك ماغير هجولة وصرقعة وهبال ماله حد
المهم وابوي يتحمد ربه على اللي يشوفه مني - حس اني عقلت او بديت اعقل -وقام راح يبي له كم من شغله عاد انا بغيت افاتح امي بالموضوع كونها قريبة مني اكثر من الوالد >>>>> ايه بلاه مهجدن آآآبو اللي جابك

قلت ياميمتي وشلون جيراننا ؟ قالت بخير وليه تسأل ؟؟ قلت هه !؟!؟ لابس يعني هم جيراننا ولهم حق علينا انا نسأل عنهم !! قالت ويوم انك تجلد وليدهم واعزاااه عنه مافكرت فيهم ؟؟
قلت وانا احك راسي : قديمة السالفة ... قالت قديمة وقبل اسبوعين ؟؟ قلت ياوالله النشبة ابي اكحلها عميتها يمه وشرايك اعرس ؟؟
امي تقل اللي مكبوب عليها سطل ماء بارد بعز القوايل : هاه ؟؟ انت ؟؟ وليه ؟؟ وشوله ؟؟
قلت اما عن الاول فهو انا واما عن الباقي .... فمعليش هذا السؤال ماله داعي !! >>>مسوي اخلاق
قالت مهب مشكلة ابشر بسعدك ادور لك .... وييييييييين يبو الشباب !!>> ايه اطلع على حقيقتك ابو العربجه
قلت لالالا فيه اناس مايحتاج اجاويد ويقربون لجيراننا بس ما اعرفهم !!

قالت ولاتعرف من يقاللهم ؟؟ قلت على بلاطة : انا شفت بنتهم عند باب بيت جيراننا وجاااااااااااازتلي>>>> من قلب طالعة
قال خير ابشوفهم .... قلت الله لايخليني منتس يميمتي ولايحرمتس الاجر >>الرجال صار اخلاق ..... والله من الخرطي
قمت انا ورحت للاستراحة عند العيال وكل وقتي هواجيس في هواجيس ولانب مع اللي يلعبون البلوت ولانب مع اللي يناظرون الدش انا في عالم ثااااااااااااني وخاااااااش جو وأجلس أألف معها قصص وحكايات وربي لاهي موجوة في الواقع ولا هي في الخيال >>>>> اجل وين يبو ؟؟
وكلها كم يوم وترد لي امي ولاني على احر من جمر جتني وهي فيها الضحكة قلت هاااه بشري ؟!؟

قالت : هم يقربن لجيراننا وناس اجاويد وابشرك هي مهب مخطوبه بعد !!!
قلت يااااااااااهووووووووووووووو >>>> بما ان الوضع لازال اكشن يستلزم الهبال الزايد
قالت : وجع انهبلت !! قلت : هاه لا بس ابد سلامتس شي خفيف
قلت طيب قولي لهم ترانا .....!!! قاطعتني وقالت : لاتوصي حريصة كل شي قلته وقالو انهم بيردون لنا بعد يومين
قلت علي الحرام والملازيم انتس اطلق ام في الدنيا >>>>>>> ماقلت لكم مسحب السست !!
طبعا امي بحكم خبرتها في مجال الطهبلة اللي حاشها مني عرفت وش المقصود وراحت ..
انا طبعا صرت اسبح كل يوم عقب ما كنت اسبح بالاسبوعين مرة .... وصرت محافظ على الصلاة في المسجد عقب ماكنت افقع الشروخه واجدعها عليهم وهم يصلون
صرت انسان ثاني حبيب ومحترم واصدقااني سحبت عليهم كلهم لاني بنظرهم اني صرت خكري >>>>تراه نصاب !!
قلبت الموازين كلها لاني شفت شي عجيب

...... وجا اليوم الموعود ......
انا حالتي حالة وارجف تقول دينا واقفة عن الاشارة .... جت لمي امي واحاول اني اخفي الرهبة اللي عندي وقالت ....: الظاهر ياوليدي .... قلت : وش تقولين ؟؟
قالت ياوليدي : الدنييا قسمه ونصيب ...... قلت : هاااااااااااه !!!
قالت : وش بلاك انت ؟؟ اصبر لين اخلص .... قلت : طيب وش صار يله !!
قالت : موافقين ورح لمهم انت وابوك ...... انا تقل اللي مغرقينه في مسبح له ساعة ويوم فكوه عنه طلع وجلس يناشق له ساعة !!
طبعا اما عن حالتي فلاتسألون وربي اني ما اشتهي الاكل ولا ابي اذوق اي شي ... >>>معذور
طبعا الوالد الله يتسمح عنا وعنه طايح فيني استهبال وتمسيح بالارض .. >>> والله ما الومه

قال : الحين انت مصدق انك تبي تتزوج ؟؟ >>> طبعا سماحة الوالد يستهبل بس مادريت انه يستهبل إلا اخر شي
قلت ايه ووشفيها ؟؟ قال : مابقى إلى البزران يحتسون بامور العرس ... قلت وانا تغورق عيوني: الله يسلمك ...
قال : بس والله اني ودي اخليك تعقل ونصحوني باني ازوجك .... قلت : وش قالولك عني مهبول ولا ما افهم ... روقنا ياهوه !!
قال : هاهت عليك الشجرة بلا .. اعقل وصر رجال لاجيت تكلمني يالهيس !!
قلت :العذر والسموحة ... قال باتسر نبي نروح لابو البنت لاتفشلنا لاتوطى ببطنك تفهم ؟؟>>>> لعنبو الاخلاق التجارية !!
قلت : تم ... طبعا من هذا الوقت لين ماركبت السيارة مع ابوي والوقت يمشي صفر كلم في الساعه حسيت بان اليوم ذاك اطول يوم في حياتي كلها مع اني اصلا ماقد حسبت للوقت في حياتي

المهم ويجي اليوم الموعود .. واركب السيارة واسوق بالوالد وماغير اهوجس وكل شوي ابوي يصرخ باعلى صوته يمين يساااااااااار ياثور انتبه !! وانا والله عايشن حالة عجيبة حالة يمكن اوصفها بالمصطلحات المعربجه : المقزز

-=-=-=-=-=-
طبعا الشرح لهذه الحالة :

هي حالة يكون فيها الشخص اما جالس يهوجس ولا سكران >>> والله الفرق ... والتقزيز مأخوذ من القزاز حق السيارة واذا قيل لفلان قزز يعني سكر درايش سيارته ...
-=-=-=-=-=-

نرجع للسالفه
المهم وصلنا للبيت .. واستقبلونا استبقال حار بصراحة واكرمونا اكرام ماله حد ..
بس ضيق صدري شي واحد ... اللهم لك الحمد ابو البنت وعياله كلهم شيون ومافيهم ذرة زين ..
انا قلت : شكلي جبتها على عماها ... شكلها شيفة وانا تدبست فيها >>>> تكفى يا راغب علامة ولا جواد !!!
المهم وانا مكتم ولا اتكلم ولا كلم واذا سألني احد سؤال اجاوبه جواب واحد لا اكثر >>> الركادة زينه
وانا مشتب بين رغبتي وتعلقي في البنت وبين تفاجئي في اشكال اخوانها

صكت علي الدنيا من كل جهه وطبعا طلعنا منهم ورحت اتكلم مع ابو البنت بامر النظرة ... وتفاجأت بحسن تعامله .. ووافق وحددنا متى اجي
طبعا من هالوقت وانا تقل اللي تراجع عن المهمة ..!! ما ادري وش السبب بس بصراحة الواحد بجانب الاخلاق لابد من ان يكون هناك ولو جزء بسيط مما يرغب الرجال في المرة ..>>>صارت محاظرة !!
انا صرت على ناااار وضاق صدري لدرجة اني بغيت اهون عن الامر كله .... بس تراجعت وقلت يمكن انها مهب مثل اخوانها ... وحالتي حالة
طبعا جا اليوم اللي فيه اروح لهم .... وصرت في حالة لايعلمها إلا الله والله يالعرق يتصبب من جسمي تقول راكض لي 10 كيلو
لدرجة اني كلمت واحد من الشباب ياخذني لبيتهم ويحتريني لاني عجزت اني اسوق مما فيني ..
وصلت للبيت .. واستقبلني اخوانها وانا اشوفهم وزادت ضيقة صدري مررررة >>>خلاص عاد لجيتنا
طبعا جلست في المجلس وانا منب معهم مغير افكر في هاللبنت المسكين لو كانت مثلهم وش ابسوي !!!
مالها داعي احرجها واحرج اهلها !!
وانا في صدد التفكير بهالموضوع >>>> مايمديكم عليها
مادريت إلا وتقول تفضل .... انا اطالع !!!!!
قلبي صار ماطور من كثر الدق .... وانا اشوفها ...
سبحان من خلق وفرق
يالله ما اجملها .... كانت لابسة فستان مدري جلابية مدري وشي بس لونها عنابية غاااامقة
وبشرتها بيضااااااا فجاي التضاد في الالوان جميييييييييل جدا ...>>>اروح يا جيفنشي !!
وشعرها اسود وطويل وسايح على وجهها وطالع النصف فقط
ياللله ما احلاها ... اناظرها واقول سبحان اللي خلقها وسبحان من جملها ..
وكانت مسحية بشكل عجيب ويحق لها بصراحة وانا في هذاك الوقت تقل طالع من حمام سونا ...
كانت اروع ما قد رأيت لدرجة اني نسيت كل من رأيته في الفضائيات وجعلته هي بجمالها الآخاذ صفحة من صفحات الماضي >>>تراه تسذا يخربط !!
المهم انها ما ابطت وكانت هاللحظة من اروع اللحظات ومن اسرعها وانا طبعا تشكرت من ابو البنت على حسن الضيافة ومشيت وانا كلي هواجيس وتفكير ببنت الناس !!
طبعا في الفترة اللي نرد لهم ويردون لنا كانت فترة طويله قصيرة ومملة وجميلة >>>الاخ يقاله اديب
حاستني هالنظرة وصرت لاجا الليل ماغير مهوجسن بها ولا انام به ابد واروح للكلية وانا مانمت طبعا امي وابوي لاحظو هالتغير ولاحظو قلة اكلي >>> بعذرهم لاصرت تاكل بلم رز مع دجاجة ونصف ماينلامون
طبعا امي قدرت الحالة بعكس سماحة الوالد اللي صاير يمسح بي البلاط كل ماشافني اهوجس ويقول :
خلك رجال خلك شديد ... وانا ابوك يوم اعرس على امك ما شفتها ولا قد فكرت ولا اثربي هالشي ذا وانت يوم انك تلزم وتشوف شف وش صار لك ..... مااااااااش منتب رجل شكلك والله العالم توك بزير ولا خلصت فطامك
وانا بصراحة بغيت الفه باقرب قوطي عندي ...بس تمالكت اعصابي وقلت : يابيي الله يجزاك خير انا ان صرت عربجي ماعجبتكم وان صرت رومانسي برضه ماعجبتكم ....وش تبوني اصير يامال العافية ؟؟ >>> بغيت اقول يامال العمى بس قلت ياولد لاتجيك تشوهات مال امها داعي
قال : نبيك رجال يامال الصلاح >>>>>> وش انت شايف يامال العمى ... اسف يامال الغنيمة
قلت : خير ان شاء الله بغيت بس مني شي لاني تعبان وودي انام الله لايهينك
قال : قلعتك !! >>>> بصراحة تكلف سماحته

يتبع
منقولة



خـلـقـت لـي شـمـوخ وهـامـه..مـاطـالـهـا طـويـلـيـن الأنـفـااس
ورفعت نفسي فوق عالي الغمامه..اشوف زلات البشر وارفع الرااس
واليوم كلن خصني بإحتراامه..واللي معاديني بالاقدام يندااس