مابي اكووووووووووووون بخيله هذي بعد كم من جزء بنقله لكم
وهاذي التكملة لعيونك (شذونة)
الجزء الثاني:
رفا : هههههاي ما أحد قال لج سوي نفسج طيبه
سحر : وأنتي من وين طلعتي ، اليوم شفيج قاعده مغثه على كبدي ؟
رفا : خخخ وشسوي ؟ .. اليوم إجازه
سحر : أف إجازة وسحـر تتعذب
رفا : يحصل لج أني أقعد معاج يالخبله ؟
سحر : رفا ساعديني بالعشا بلييز
رفا : أناا شكو ، طبخي أنتي وبعدين شوفي أنتي قدمي العشا يمكن واحد منهم ما عنده نظر ويخطبج
سحر : والله ما تستحين
رفا : قومي زين صرتي 17 يلا خلصينا
سحر : وأنتي 24 ، ليش مو أنتي اللي تخلصينا ؟
رفا : تبيني أنـــا آخذ أي أحد ؟
سحر : قطــع غرور مدري على شو ، من حلاتج عاد ؟
رفا : أحلى منج يا أم عيون
سحر : حلااتها عيني كبيــره تهبـل ، مو مثلج تقولين يابانيه ، أقوول ماما ، أنتي فاتحه عينج ولا مسكرتها
رفا : ثقيله ما تضحكين
سحر : أقول وخري بروح المطبخ
------------
هيـام : كلمتي ثقيله الدم ؟
ساره : لا عاد ، مدري ليش ما تحبينها ، والله إنها طيبه
هيام : جد والله ؟ .. أي طيبه الله يهديج بس أهي لاعبه بعقلج ، أقول سكريها سيرتها مالي نفس أرجع ، قومي بنغير جو
ساره : وين نغير ؟
هيام : يعني وين ، نبي نطلع
سارة : الله ، الحيــــن !
هيام : ايه الحين شفيها ؟
ساره : لا بس الوقت متأخر
هيام : أووه لا تسوين فيها متأخر ، يلا ترى حدي متضايقه
سارة : أوكي بس أخبـر أمي
هيام : يا الله على دجاجه أمها
--------------
لولوة : ماااي ماذر ، مااي ماذر
أم فيصل : تكلمي عدل أنتي
لولوة : واي يمه ؟
أم فيصل : أقول مستانسه على عمرج بكلمتين الأنجليزي اللي تعرفينهم
لولوة : تحبطون الواحد أنتو ، أنزين بروح حق سحر
فيصل : سحر يطيحج بفراشج قولي آمين
أم فيصل : يـــه شكو تدعي على بنتي ؟
فيصل : رشود قايل لي قول لها ما تجي
لولوة : بس سحر كل تقول لي تعالي
فيصل : مو يالخبله تجاملج
لولوة : يـــه أنت شكو هاا شكو ؟ .. كيفي كيفي
فيصل : بقص لسان بنتج
لولوة: يمه يمه خوفتني ، أقول اقلب وجهك
أم فيصل : حبيبتي إذا رحتي عطي سحر فستانج أهي تعرف تخيط
فيصل : منو قال بوديها أصلا عشان تعطيها الفستان
لولوة : لا أبوس أيدك أبي أروح معاك
أم فيصل : أبوك بيوصلها ، أنت أقعد
لولوة تطلع لسانها : وييييييييييييو
فيصل : باكفخها
أم فيصل : أعووذ بالله منكم !
-----------------
راشد : درب .. درب
سحر : رفووي تعالي المطبخ وصلوا ..
راشد : حيااكم شباب
محمد : اللــه ، عندكم بلاي ستيشن أبا ألعب
مشعل يدوس على رجله : هههه [ بهمس ] أثقل لا تفشلنا
راشد : خخخ يعني في شي جديد ، خلص عشا وأقعد على كيفك ألعب
محمد : وأحنا شايفين عشا
راشد : ههههههه حبيبي انت ، أصبر الحين بجيبه ، مع إني قايل لهالخبله تحطه ، بس أصبر شوي
طلع راشد من الصاله وبقى مشعل ومحمد .. والباب كان مفتوح شوي
محمد : مشعلووو ، شووف في صوت بنت الظاهر هاي اللي رمستها
مشعل : نزل عينك بط فيها
محمد : يــه ليش ؟
مشعل : أنت ما تستحي ؟
محمد : ليش ؟
مشعل : ترضاها على أختك ؟
محمد : وأنت ليش معصب جي؟
مشعل : بعد أنت تقهرني
-----------
راشد : وين العصير ؟
سحر : وين عشاي ؟
راشد : العشا بالصاله ، بس قولي لي وين العصير
سحر بإبتسامه : ما ســويت
راشد : ومستانسه على عمرج ؟
سحر : أنت ما قلت لي !
راشد : أفففففف الله يعين اللي بياخذج
سحر : تقصد يا هناه
راشد : لا تطولينها يلا روحي سوي لنا عصير برتقال
سحر : أففففف أنزين
------------
راشد : حيا الله الربع
مشعل : الله يحييك
محمد : اللـــــــــــــه ، شكله روعه ، أقول مو حاطين لنا فيه شي ؟
راشد : لا بس بالصحن اللي على طرف حاطين شويه هيروين عن خاطركم ، تستخف بدمك حضرتك
مشعل : ما عليك منه ، حيـاك معانا ، تراك من أهل البيت
راشد : والله ؟ مشكورين ما تقصرون
محمد : أقول سكر الباب ما اباهم يشوفوني وأنا اكل
مشعل : هههههه صدقني بتلوع جبدك وما بتاكل شي إذا شفته
-------------
سحر : أفففف
رفا : شفيج ؟
سحر : شفيني يعني ، حابسينا بالمطبخ تبيني أرقص ؟
رفا : ومنو قال لج قعدي بالمطبخ ، صعدي دارج
سحر : والصحون تغسلينهم أنتي ؟
رفا : لا عيوني ، أنا بروح أنا بكره عندي دوام
سحر : روحي
رفا : سلمي لي على الشباب وإذا في واحد حلو قولي لي
سحر : والله قليله أدب
رفا : من حلاتهم عاد ، بالله باخذ ناس جذي
سحر : وهو أنتي تدرين منو اللي داخل ؟
رفا : منو
سحــر بهمس : ولد العبد الله
رفا : حلللللللللللللللللللفي
سحر : والله
رفا : ولد العبد الله في بيتنــا !! ، ياااااااي ، أقول سحور ، لما يطلع يمكن تطيح صورته أخذيها وعطيني ، يقولون عنــه يدووخ ، يطيير ، يذبح ، يعذب
سحر : رجاء لا تتغزلين فيه
رفا : ريلج وأنا ما أدري
سحر : جبي زين
---------------
مشعل : آآآآخ تسلم الأيادي أما الأكل شي غير طبيعي
راشد : بالهنــا
مشعل : حموود أنا باطلع باخذ شي من السياره وراجع
راشد + حمود : أوكي
طلع مشعل من الصاله وفتح الباب إلا يشوف أيد لولوة على الباب
لولوة : يمــــــه منو أنــت !!
مشعل : أنا مشعل
لولوة : ما قلت شنو أسمك ، قلت منو أنت
مشعل : صديق رشوود
لولوة : أهــا ، طيب من شكلك كأنك ماخذ راحتك في بيتهم ، عشان جذي ناد لي سحر
مشعل : شتبين فيها ؟
لولوة : أبيهـا تخيط فستاني
مشعل : وأهي تشتغل عندج مثلا ؟
سحر وأهي ورى مشعل : لولوة حبيبتي عطيني الفستان
مشعل أنحرج منها ألتفت عشان يبي يروح الصاله ، إلا إيده لمست صحن العدس اللي كان بإيـد سحر وطاح على رجلها
سحر بصوت خفيف : آآآآآآآآآآآآآي
لولوة : سحـــــر
مشعل ما عرف شنو يسوي : أختي ؟ .. تعورتي
سحر بعيون مسكره : لا ما فيني ،، آآآخ
مشعل : لا جد قولي لي ، أخذج المستشفى ؟ .. شكلج متعوره حيل
سحر : ما يحتاج ،، ما فيني شي
لولوة : الولد خايف عليج ، روحي معاه
سحر شافت لولوة بعيون حاقده : قلت ما صار لـ ،، [ تصاارخ ] أآآآآآآآآآآآآآآ
مشعل : سحـــــــــر
سحر ولولوة سكتوا
حاول يغير الموقف فراح ينادي راشد : رشووووووود
راشد سمع صوته يصارخ ركض له : خير شفيك ؟ .. سحر شفيج طايحه على الأرض
مشعل : كنت أنا أبي ......
سحر تقطعه : كنت ابي اعطي لولوة صحن العدس وطاح من أيدي
راشد : أشوف ريلج وين تعورتي
سحر بعيونها تأشر
حس فيها مشعل : أقول راشد ، أنا بروح الوقت تأخر
راشد : لا وين تروح مشعل خلك هنا
مشعل : لا بروح ، نزورك مره ثانيه إن شاء الله
سحر بصوت ناعم : بتـروح وأنا تعبت وأنا أسوي لكم حلويات ؟
راشد : ايه يبه ماكو طلعه إلا لما تذوق حلويات أختي
مشعل : بس ...
راشد : لا بس ولا شي ، أدخل داخل ، انا بحمل سحر إلى غرفتها وراجع لكم ، بس قول لمحمد ترى الصحون ما ينأكلون
---------------
مشعل : وأنت للحين تاكل ؟
محمد : أكلهم حلو
مشعل : الحمد لله والشكر ، أقول حمود ما نبي نطول عندهم
محمد : ليش ؟
مشعل : شوف الساعه ، وبعدين بكره مدارس
محمد : وإذا مدارس شو نسوي ؟ راشد مو بالمدرسه
مشعل : أفهــم يا غبي ، خواته بالمدرسه
محمد : ونحن يالسين بحظن خواته يعني ؟
مشعل : أفففف ، خلصنا يلا
------------------
[ يوم جديد ]
في المدرسه
سحر : أفففففف تعباانه أبي أنام
روح : ليش سهرانه يا حظي ؟
سحر : مو لأن كان عندنا ضيوف
روح : إلا تعالي شفيها رجلج ؟
سحر : ما فيها شي بس صحن العدس طاح علي
روح : أهاا ، أنزين جم واحد أهم ؟
سحر : أمم ولد العبد الله و الثانــ ،،،،
روح مسكت إيد سحر : هااااااااااااااااا ، ولد العبد الله في بيتكم
سحر بغرور : ايه ، شفيها يعني
روح سحبت سحر من ملابسها : سحوور شفتيه ؟ فيس تو فيس ؟ ..
سحر : لأ
روح : مينوونه أنتي ؟
سحر : يمه ليش شسويت ؟
روح : في وحده ولد العبد الله يكون في بيتهم وما تشوفه ولا تتأمل جماله
سحر : عبالج انا مثلكم ما أستحي على وجهي ؟
روح : سحوور هذا عذااب ، حتى لو تموتين حيـا ، جدامه ما تقدرين تشيلين عينج من عليه
سحر : الحمد لله والشكر ، أقول قومي راح تبدي الحصه ، إلا على طاري الحصه وين سارو ، العاده أشوفها عند الباب واقفه لي ؟
روح : شفتها مع هذيج المعفنه هيام
سحر : شنو معفنه أنتي ما تعرفين تتكلمين ؟
روح : تقهرررررني والله تقهررررني حركاتها مأساه
سحر : بسج حش في العالم ، تشوفين أبله تسنيم الحين تتوعد فينا ..
روح : يمه خوفتني عاد !!
....................................................................
الجزء الثالث:
مشعل : حموود
محمد : ....
مشعل : حمووود
محمد : ....
مشعل : حمود و وجع إن شاء الله
محمد : أففف شتبا ؟
مشعل : أف فشله
محمد : شو فشله ؟
مشعل : طيحت الصحن على رجل سحر
محمد : سحر ؟
مشعل : أخت راشد
محمد : صارت سحر حرف ؟ ، وبعدين أنت اللي طيحته والله ما تستحي
مشعل : مو قلت لك ، والله فشله
محمد : عادي ابويه إلا ما تعرفها
مشعل : شكلها وأهي تتألم عذاب
محمد : مشعلووو ، البنت متغطيه أنت شدراك ؟
مشعل : ها ؟ لا بس لما طاحت ، اللي ......... ، وبعدين أنت شكو ؟
محمد : هااا ليكون حبيتها من أول صحن عدس
مشعل : هههههههههه ، لو أحد سمعك بيقول لك تقول نكته ، بالله مشعــل على آخر عمره يحب ؟ .. يا أخي خليناه لكم ..
محمد : و زوجتك ما راح تحبها ؟
مشعل : أمممم مدري بفكر ، والله إذا طلعت سنعه وتسمع الكلام .. نغصب نفسنا ونحبها
محمد : ما أقول إلا الله يعين اللي بتاخذك
مشعل : تقصد هنيالها
محمد : أنزين خلصني ، أنا وراي شغل
مشعل : له له له ، لا ينط لك عرج بس ، أي شغل يرحم والديك بروحك بطالي ؟
محمد : بطالي ؟ .. والله أبوك عنده شركه كبيره وأنت بعد بطالي
مشعل : والله لأني أدرس ، وهو ما يبيني أدرس وأشتغل ، عشان ما يأثر علي
محمد : يرحم أمك بس ، إلا ما قلت لي وين راشد ؟
مشعل : مدري فيه ، أصبر بس أنا اوريك فيه ، هذا وأنا قايل له تعال لي
--------------------
الاستاذه تسنيم : أنتي يا بنت
سحر : يا عيون البنت
البنات : هههههههه
الاستاذه : أصطلبي
سحر : إن شاء الله .. خير أستاذه أكو شي ؟
الاستاذه : بتتكلمي في أيه أنتي مع دي ؟ ..
سحر : إستاذه ما تكلمنا
الاستاذه : بتكزبيني يا بنت ولا أيه ؟ .. بازني سامعاكو .. بتأولو حلو ..
سحر : لا استاذه شنو حلو .. ما نتكلم عن شباب أحنا .. أستغفر الله عيب ، هذا وأنتي مدرسة دين
الاستاذه : تفهميني بشغلي ؟
سحر : لا حشــى علي والله .. بس أنتي تتهميني
الاستاذه : ورى يا بنت .. اوأفي ورى ..
سحر : نعم ؟
الاستاذه : تستعبطي علي ؟
سحر : مع أحترامي لج ، ماني رايحه
الاستاذه : أيــــــــــــــــــــــــه ؟!
سحر : تبين أطلع برى بطلع ، بس إني أوقف ورى لا أسمحي لي .. إذا أنتو توقفون فهذا لأنكم تحصلون رواتب كل شهر ، بس أنا لو وقفت ورى شبستفيد ؟ .. بتعطوني راتب ؟
الاستاذه : أنتي محدش كسر لك دماغك ؟ ..
سحر : هـــه ما عـــــاش
طلعت سحر من الصف ، والبنات كلهم مندهشين
الاستاذه : درس اليوم مشــروح
روح : أفااااااا ابله ليش ؟
الاستاذه : ما يدخلكيش أنتي
روح : أستاذه باجر أمتحان ، ما يصير ما تشرحين !!
الاستاذه : هو أنتي عايزه تلحئيها ولا أيه ؟
روح : كيفج
الاستاذه : برى أنتي كمااان .. بـــرى
روح : أوكي
.. طلعت روح من الصف أهي بعد .. وركضت لسحر اللي كانت واقفه تشوف حديقه المدرسه ..
روح : يتهنـــى به اللي ماخذ عقلج
سحر : ....
روح : سحــر .. سحـر
سحر : هلا
روح : وين يبه وين ؟ .. ها وين وصلتي للكوشه ولا طياره العسل ؟
سحر : هاا ؟
روح : تفكرين بمنو ؟
سحر : ما أفكر بأحد
روح : عليييييييييييييينا ، ما قط عليج كلمتين غزل ؟
سحر : أنتي هييي هييي هييي .. وين قاعدين ؟ .. شنو كلمتين غزل ؟ .. قلة أدب والله .. وبعدين تعالي منو قال لج إني أفكر باحد .. ويييع مالت عليج .. عبالج فااضيه ؟ .. ولا مخي بنعالي حاطته مثلكم
روح : وي أسم الله علي
سحر : أجل لا تقولين لي فاهمه ؟
روح : خخخ لا بس شكلج قدام الحديقه والشمس بعينج ، وشعرج يطير ، كأنج جوليت تنطر روميو
سحر : أم الملاقه من صباح الله خير ..
روح : .. بل فشلتيني .. أنزين ما قلتي لي عن اللي صار أمس
سحر : شنو صار ؟
روح : يوم ما كان مشعل في بيتكم
سحر : أففف لا تلوعين جبدي لو سمحتي
روح تمسك رقبتها : مااااااااااااااااااااالت علييييييييييييييج .. مشعل صار يلوع الجبد .. صج ما عندج نظر .. صج غبيه .. صج ناس ما تفهم ولا تحس .. مالت بس مالت .. والله بس لو عندي اخو أخليه يرافجه .. مو أنتي يالخبله .. ولا كان يبي يوديها المستشفى وما رضت .. لأنج ثــوره وما تتعلمين .. كان قلتي له أوكي .. وكل دقيقه قلتي آآي .. وبالمستشفى تقولين ما أقدر اوقف .. فـ يروح ياخذ لج كرسي متحرك .. بعدها يمسك أيدج عشان تقعدين .. وأنتي بنعومه تمسكين أيده ، طبعا بعدها ما راح يترك أيدج فـ ....
تقطعها سحر : سخيييييييفه وربي سخييييييفه .. وايد متأثره بالأفلام حضرتج ..
روح : أنزين سحوور شفتيه ، شفتي شكله
سحر : لا
روح : حلفي !
سحر : والله ..
روح : مينووووووونه .. أنزين ما امممم .. شنو كان لابس ؟
سحر : أممممم على ما أظن كان لابس جينز وفانيلا
روح : وااااااااااااااااااااااااااي عمري الجينزز .. وااااااااااي ، أمانه كان فاتح الزر ؟
سحر مو فاهمه : أي فاتح زرين من فوق بالفانيلا
روح تنام على سحر : هــــــــوا .. هـــــــــوا .. واي قلبيييي .. أكيد صار شكله اينن وأهو فاتح الزر .. وااااااي عذااااااااب .. عذاااااااب .. سحر .. أنتي أكيد طاح صحن العدس من جماله .. ما قدرتي تقاومين صح .. سحووور شفتي شعره .. طويل مو ؟ مو ؟ مو ؟ .. آآآآآآآآآخ قلبي .. قولي له صديقتي للحين ما تزوجت ما تاخذها ؟ .. أي أي كان لابس النظاره السوده اللي يلبسها ؟ .. لا تقولين أي الله يخليج .. لأني بمووت ترى .. ما أتحمـــــــل ..
سحر عصبت : أقول قلبي ويهج عني لا أعطيج بكف يسنعج يالسخيفه .. ما عندج سالفه .. ذابحه عمرج على هذا ؟ ..
روح : أنتي روحي فحصي النظر الله يخليج
....................................................................
الجزء الرابع:
راشد : وأجتمعـــــــــت شله الفسـاد
مشعل : أحم .. أسمح لي أنا مو فاسد
راشد : خخخخ عندنا أحنا مو فاسد ، ولكن عند أختي أكبر فاسد
مشعل : هاا ؟
راشد : لأن شوف الاشرطه اللي موزعه في كل مكان ، هذا الفساد بعين أختي
مشعل : أدري إنه فساد .. بس هذا حموود اللي مخربني
محمد : هاا أبويه ؟
راشد : ما تشوف نغمتي نوكيا ، أقول لك مره سمعت نقالي يرن بأغنيه الجسمي ، ما بغيت غير راسي ، حذفت الجوال على الطوف
مشعل : أووووف .. اجل لا تشوف نقالي
راشد : إذا ما تبيه بس قول لي بعطيها ..
مشعل : خخخخ ما شاء الله عليها ..
محمد يحرك راسه مع الموسيقى : أحبك .. أحبك .. أحبك ..
.. تــــرن تـــرن ..
راشد : ويت شباب
..
راشد : ألووو
سحر : السلام عليكم ..
راشد : وعليكم السلام ..
سحر : راشد
راشد : نعم ؟
سحر : أول شي شهالصوت اللي بالسياره ؟
راشد : هاا [ يأشر لمشعل عشان يسكر المسجل ] ..
سحر : قلت لك شهالصوت ..
راشد : ههه ما في شي شفتي ، المهم أنتي مو بالمدرسه ؟ ..
سحر : بلا
راشد : أجل ليش متصله ؟
سحر : أبيك ترجعني البيت
راشد : ليــــش إن شاء الله ؟
سحر : بطني يألمني
راشد : بس أنا ما عندي سياره
سحر : تصرف ياخي
راشد : أوكي .. أوكي .. يلا فمان الله
سحر : الله معاك
-----
محمد : شو صاير ؟
راشد : أقول مشعل نزل هذول بيوتهم و أخذني لمدرسه أختي ، تعبانه أبي آخذها
مشعل : أووكي تااامر
----
- عند مدرسه سحر -
سحر : وين بتركبني ؟
راشد يأشر على سيارة مشعل : هنا
سحر : لأ !
راشد : شنو لأ
سحر : يا أخ ماخذ لي صديقك ليش ؟
راشد : مو هي سيارته يا عبقريه ، يلا خلصينا الريال قاعد ينطر
سحر : أففففف أنزين
ركبت سحر السياره وقعدت ورى وأهي منزله راسها : السلام عليكم
مشعل : وعليكم السلام
راشد : إلا أقول مشعل ما بتروح مكان اليوم ؟
مشعل : أقعد مكانك عاد ، كل يوم والثاني مطلعكم
راشد : أفا ما نستاهل ..
مشعل : لأ
راشد : أنزين تعال شفيك تمشي على 40 يا أخي ؟ .. سّرع ، سحوور باخليه يفحط فيج ويخلي السرعه على 180
سحر بنبرة تعب : راشـــد !! .. أنا تعبانه
أحم ، أما مشعل لا تسألون عن حاله ، الولد ذاب وصار ما يشوف قدامه من صوتها ، أما راشد كان يحتاج لمطافي لأنها حرقت وجهه ..
مشعل : راشــــد !
راشد : يه كليتوني ، أتغشمر معاها بس أهي هاليومين صايره ثقيله
مشعل بهمس : رشود ، رحت فيها
بقت سحر تطالع راشد بعيـون أنتقــام ..
لحد ما وصلوا إلى البيت ..
سحر : مشكور أخوي
مشعل : العفو .. [ بإحراج ] .. إلا شخبار رجلج ؟
سحر : الحمد لله الحين أحسن ..
طلعت من السيــاره سحر .. ونزل وراها راشد ..
وقبل ما ينزل ..
مشعل : رشود كلم الأهل بالموضوع ..
راشد : تامر حبيبي
دخل راشد البيت
سحر بدلع : يمــــــه بطني يألمني !
أم راشد : وي يمه تعالي وياي بعطيج دوا و روحي نامي ..
راشد : دلع بنات
سحر : أسكت أنت
راشد : أحترمي نفسج
سحر : أستغفر الله ..!!
راشد تفشل : يمه بقول لج شي بعدين ..
أم راشد : شنو ؟
راشد : لا عطي بنتج أول دواها بعدين
سحر : لا لا بس صرت بخير .. شصاير ؟
راشد : يلعن أمها اللقـــافه !!
أم راشد : يلا أخلص غداي على النار ..
راشد : أوكي خلكم وياي على الخط .. أول شي .. بما إني طالب جامعي ومحتاج مصروف .. وما أحب أعتمد على غيري .. قررت اشتغل .. و طبعا مثل الشي كان في بال مشعل .. ولحسن الحظ .. إن أبوه كان مقرر إنه يفتح محل ملابس نسائيه .. طبعا المحل راح يكون فخم مثل ما تعرفين وتقريبا ما بقى غير وقت قصير على الأفتتاح ، لأن باديين فيه من وقت طويل .. وأهو قال لي إن يبيني اشتغل معاه في الحسابات وما أدري إيش ، المهم قال لي اخبركم إذا تعرفين بنت ذويقه نخليها بالمحل
سحر : وااااااااااااو .. أنا .. أنا .. أنا
أم راشد : نعم إنتي ؟ .. والمدرسه ؟ ..
سحر : لا يمه ، على بال ما يفتحون المحل أكون خلصت مدرسه .. وأهو يقول إن نسائي يعني ما راح يدخلون رجال .. إلا إذا كانوا مع زوجاتهم .. مامي بلييييييز .. ورشود هناك بعد .. يعني لا تخافين علي .. وأنتي تعالي بعد أي وقت تبين .. وكل دقيقه والثانيه بدق عليج .. ما فيها شي مامي ..
راشد : إي يمه عادي ، لأن هناك بعد في بنت تشتغل .. بس لأن نبي نزيد العدد .. خصوصا إن المحل طابقين مو واحد ..
أم راشد : أخاف عليها ..
راشد : يا يمه الله يهداج ياهل أهي تخافين عليها ؟ .. بعدين أنا أغلب الوقت بكون هناك وياها ..
أم راشد : أمممم مو مشكله بالأول أقول لأبوك ويصير خير
سحر بوناسه : واللـــه ؟؟ .. يااااااااي .. يا بعد أهلي أنتي والله يا يمه ..
أم راشد بحاجب مرفوع : وين اللي بطنها يعورها ..
سحر : هااا .. إي .. آآخ .. يعورني
راشد : هههههههه أما أنتي ..
سحر : ياااه .. يلا رايحه أخبر رفااا ..
----
من الوناسه طاحت على الدرج .. لكن ما منعها هذا من إنها تواصل ..
ركضت وقعدت تضرب على باب رفا ..
رفا فتحت الباب بعصبيه : هاااااااااا ؟
لمـــت رفا بقــوة وأهي تصاارخ : بشتغل .. بشتغل
رفا : قمي عني .. شتقولين ؟
سحر : باشتغل في محل بيت العبد الله
رفا : أووووف .. يا بنت اللذين آمنوا وعملوا الصالحات .. بيت العبد الله مره وحده
سحر : إي بشتغل في محلهم .. حتى رشود لأن صديقه مشعل بعد راح يشتغل هناك
رفا : سحور .. يلعن أمه هالحـظ .. حسافه الظاهر ما لي حظ بولدهم
سحر ما تدري بالدنيا : ها .. شصاير منو ؟
رفا : ما لي نصيب بمشعل .. دام راح يطيح معاج كل يوم .. ضعنــا
سحر : أبيييييييه تعالي .. أنا توني متذكره .. إن شاء الله هذا كل دقيقتين بيدخل لي هناك ؟
رفا : لا ما راح يدخل لج .. بيدخل للزباين
سحر أنحرجت : سخيفه
رفا : لا لا شوفي سحوور .. هذا يمشي ويكب الفلوس على الارض .. يعني نبي عرس تضبطينا فيه .. و دام ما لنا أمل منه ، شوفي لي أخوه ، بس أبيه مثله حلو .. أنتي الله يهنيج فيه
سحـر فاتحه عينها : هييي أنتي هييي .. مالت عليج أنتي وياه .. اخذيه يبه ما أحد ماسكه عنج .. قطع ما اسخفكم ..
رفا : أبيييه سحور شفيج ما قلت شي اللي مديتي لي بوزج ..
سحر : لا بس إنتي سخيفه الحين أنا متعبه حالي وأقول لج وبالأخير تستخفين بدمج
رفا : أوووووف .. خلاص يبه خلاص .. يه ما يسوى علينا .. إنزين سارو دقت عليج
سحر : أووه ذكرتيني .. بدق عليها ..
رفا : خذي نقالي
سحر : يه شهالكرم ؟
رفا : خلصيني ..
سحر : أفف زيــن
..
ساره : ساره هنا .. مين معي ؟
سحر : أصطلبي لا أزنطج
ساره : هههههههههه هلا والله
سحر : هلا فيج .. باركي لي باركي لي
ساره : أنخطبتي ؟
سحر : أسم الله علي ..
ساره : ههههههههه أجل شنو ؟
سحر : بشتغل بشتغل
ساره : حللللللفي
سحر : والله
ساره : جذاابه
سحر : يا جعلني أمووت
ساره : لأ يا ما تستحين خنتيني
سحر : لا والله بس المكان ما يتفوت .. بشتغل بمحل العبد الله
ساره : أبيييييييييييه مع ولدهم ؟
سحر : إي وأخوي بعد
ساره : اللـــه .. أمانه ضبطيني عنده
رفا تصارخ : تخسيييييين ساروو
ساره : رفوووي .. حقي حقي
رفا : جبي زين
ساره : يا عفنه حقي
سحر : أففففففف .. بسكم عاد .. يلا سارو مع السلامه
ساره : الله يسلمج ..
وصلت سحر لعند الباب
رفا : سحر
سحر بدون ما تلتفت لها : خير ؟
رفا : سكري الباب وراج
سحر : يصير خير ..
طلعت سحر من غرفة رفا .. و وصلت لغرفتها وقفلت على نفسها الباب .. بتنهيده قويه أسترخت على السرير .. وأهي مسكره عينها .. وتفكر .. الحين راح أشتغل .. أخيــراً .. راح أقدر أشتري اللي أبيه .. راح أرتاح من جو المدرسه الممل .. راح أشوف ........ لكن مشعل راح يكون هناك .. شلون راح أتحمل إني أبقى معاه .. لا شنو أبقى معاه .. أصلاً أنا راح اكون مع البنت الموجوده هناك .. أوووف و ليش متعبه نفسي بالتفكير ؟ .. أروح اكل لي توت أحسن ..
ها وشرايكم انا ماراح اكمل من غير ردود ok
لو شفت ردووود حلوة بنزل كمان 3 اجزاء اليوم انشاء الله.
باذن الله ان شاااااااااااااااااااااااء
مع التحيه دمووووووووعه القطوه
سحر عيووونها قصه تجنن رووعه رووعه !! 
